今日下晝澳職季後賽4強次回合，威靈頓鳳凰返主場再鬥墨爾本勝利。首回合互交白卷，對鳳凰非常有利，因為佢哋一向靠主場搵食，喺自己地頭出擊信心爆晒棚，仲要開平手盤，可謂坐和望贏。
（無綫myTV聽SUPER周六下午2時30分直播）
首回合全面捱打嘅鳳凰，成場波甚少埋門兼踢得極度被動，好彩成功頂住勝利嘅狂轟猛炸，最終悶和0比0，絕對係佢哋最想要嘅賽果。眾所周知，位於新西蘭嘅鳳凰，在主場作賽總係踢高兩皮波，今季常規賽13次主場出擊，錄10勝2和僅1敗，冠絕群雄，單計近6次主場更加全部贏晒，其中4次保持清白之身，主場威力強勁。
勝利狀態曳凍過水
另邊廂，勝利雖然坐擁射手科拿路利，首回合更加佔盡上風，全場錄得20次射門，但咁都贏唔到波，明顯係放虎歸山。除咗把握力差之外，查實勝利近期整體狀態亦麻麻，近5場法定時間僅3和2負未贏過，其中3場食白果，就算單計客場近8場只得1勝5和2負，包括輸畀今仗對手鳳凰，今次出征新西蘭凶多吉少。