亞洲盃D組大戰，首輪旗開得勝嘅伊拉克同日本正面交鋒。兩隊依家都有3分喺手，出線相當穩陣，今仗毋須綁手綁腳，為爭首名資格會主動進攻。日本火力冠絕亞洲、伊拉克亦崇尚進攻，而且上場贏波後信心爆棚，預料會即時埋牙肉搏，1.5球嘅半場大值博。（HOY聽TV聽76台周五晚7時30分直播）
日本自卡塔爾世盃後愈戰愈勇，已躋身世界一線勁旅行列，上場對越南雖然一度落後，但發力後極速喺完半場前反勝3比2，最終拎到4比2漂亮勝仗。南野拓實等前鋒狀態大勇，日本入球能力相當驚人，近5場合共轟入25球，當中4次半場總入球開2球或以上。
伊拉克雙箭弗唔怕駁火
伊拉克首仗3比1擊敗印尼，西班牙主帥卡沙斯採取主攻踢法，曼聯青訓出身嘅中場伊巴爾，同箭頭穆罕默德阿里合作極佳，有力攻破日本防線，雙方駁火肯定精彩，捧半場大好路。